異動空間 2012-01-27
海豐大落後可追
龍年有個好開始，港股紅盤高開343點，之後窄幅爭持，9 RSI升至81，進入超買區，中資金融股升到你唔信，農行（250）、工行（1398）勇破250天線，短線應會整固。
本地地產股喪炒，新世界發展（017）9 RSI飆至93。記得1個月前，個市仲係一面倒睇淡（包括魏力在內），造就今次逾2000點升浪，昨牛熊證十大成交中，熊仔佔7隻，打靶位接近二萬一，短線硬挾上去殺熊的機會不低。
炒一排航運股，噚日開始回吐，但龍尾股海豐國際（1308）先起錨，短線爆升1至2成難度唔高。海豐業務集中於亞洲區，受歐美經濟影響較低，海上物流佔收入7成。
點解話海豐大落後？同業中海集運（2866）由舊年10月低位計，累積反彈88%；中遠洋（1919）都有60%，但海豐僅升39%。中集上周發盈警，估舊年由盈轉虧；中遠洋首三季狂輸47億人仔，而海豐首三季仍賺6億銀，按年只係減少13%，高上立見。睇埋估值，海豐預測PE得6倍，以民營龍頭航運股講，無理由只係「蔗渣價」！海豐上月於1.7至2蚊水平不斷回購，多個炒上藉口。
海豐近日圓底炒上，成交增，戰友可現價追入，上望2.4元，博賺17%，跌穿1.95元止蝕。
Search